விலங்குகளின் அசைவு

Please Login to view full dashboard.

Author : Admin

4
Topic updated on 02/14/2019 11:42am

விலங்குகளில் அசைவு 3 மட்டங்களில் நடைபெறுகின்றது.
- கலமட்டம்
- அங்கமட்டம்
- அங்கிமட்டம்

இடப்பெயர்ச்சி

அங்கியொன்று முழுவதுமாக ஓரிடத்திலிருந்து இன்னோர் இடத்தை நோக்கி அசைதல் இடப்பெயர்ச்சி எனலாம்.
அங்கிகளில் நடைபெறும் இடப்பெயர்ச்சி பின்வரும் நோக்கங்களுக்காக இடம்பெறும்.
- இரை தேடுதல்.
- இரைகௌவிகளிடமிருந்து தப்பிச் செல்லல்.
- பரவுதல்.
- புதிய,பொருத்தமான வாழிடங்களை தேடுதல்.
- தனியன்கள் இனப்பெருக்கத்தின் பொருட்டு சேர்ந்து கொள்வதற்காக.

இடப்பெயர்ச்சி அசைவு வகைகள்

போலிப்பாத அசைவு
சவுக்குமுளை மூலமான அசைவு
பிசிர்கள் மூலமான அசைவு
தசைகள் மூலமான அசைவு

போலிப்பாத அசைவு

அமீபா, WBC போன்ற அமீபாபோலிக் கலங்கள் தமது வடிவத்தை மாற்றி அமைக்கக் கூடியவை.
இப்பண்பு அவை அசைவதற்கான அடிப்படையாக அமைகின்றன.
கலம் அசையும் போது உட்புற திரவமயமான அகக்குழியவுரு உள்நோக்கி நகர வெளிப்புறமான புறக்கலவுரு விறைப்பான பகுதி போலிப்பாதமாக வெளி எறியப்படும்.

சவுக்குமுளை மூலமான அசைவு

சவுக்குமுளையும் சவுக்குமுளை போன்ற விந்துக்களது வால் போன்ற கட்டமைப்புக்களும் சவுக்கின் வழியே முன்னோக்கி நகரத்தக்க அலைவுகளை அடியிலிருந்து நுனி நோக்கி செலுத்துவதன் மூலம் அங்கி எதிர்த்திசையில் இடம்பெயரும்.

பிசிர் மூலமான அசைவு

Paramecium இல் ஒவ்வொரு பிசிரும் கலத்திலிருந்து நேராக நீட்டப்பட்டுள்ளது.
180° கோணவில்லுருவான பாதையினூடாக இவை அலைவதன் மூலம் துடுப்பினால் வலிக்கப்படும் போது படகு முன்னோக்கி அசைவது போல அங்கி முன்னோக்கி அசையும்.
இவ் அசைவு முடிந்தவுடன் மீண்டும் அசைவை ஏற்படுத்தாதவாறு பிசிர் மீண்டும் பழைய நிலைக்கு எடுத்து வரப்படும்.

தசைகள் மூலமான அசைவு

தசையிழையம் சுருங்கித் தளரக்கூடிய தசைநார்களைக் கொண்ட தசைக்கலங்களால் ஆனது.
தசைகளுடன் சேர்ந்து வன்கூட்டுத் தொகுதியும் உடலைத் தாங்குவதிலும் அசைவதிலும் பயன்படும்.

தசையிழையம்

பிரதானமாக 3 வகையான தசையிழையங்களுண்டு.

வன்கூட்டுத்தசை
மழமழப்பான தசை
இதயத்தசை

தசையிழையத்தின் பண்புகள்

இழுபடும் இயல்பு – இழுபடக்கூடிய / சுருங்கக் கூடிய இயல்பு.
மீள்தகவு இயல்பு – சுருங்கிய /இழுவைக்குள்ளான பின்னர் அதன் ஆரம்ப நீளத்தை அடைந்து கொள்ளும் இயல்பு.
அருட்டப்படும் இயல்பு – தூண்டலின் பொருட்டான துலங்கலை வெளிப்படுத்துமியல்பு.
சுருங்குமியல்பு – குறுகும் இயல்பு.

வன்கூட்டுத் தசையின் கட்டமைப்பு இயல்பு

வன்கூட்டுத் தசை மனித உடலில் மிக அதிகளவில் காணப்படும் தசையாகும்.
இது என்புடன் சிறை மூலம் இணைக்கப்பட்டுள்ளது.
வன்கூட்டுத் தசையை சூழ வெளிப்புறமாக மேல்தசையம் எனும் தொடுப்பிழைய உறை காணப்படும்.
வன்கூட்டுத் தசையினுள் பல தசைக்கற்றைகளை காணலாம்.
இத் தசை கற்றைகளைச் சூழ அவற்றுக்கிடையில் சுற்றுத்தசையம் எனும் தொடுப்பிழையம் காணப்படும்.
ஒரு தசைக்கற்றைக்குள் பல தசைநார்கள் /தசைக்கலங்கள் காணப்படும்.
தசைநார்களைச் சூழ அவற்றுக்கிடையில் அகத்தசையம் எனும் தொடுப்பிழையம் காணப்படும்.
வன்கூட்டுத் தசைநார் நீண்ட உருளை வடிவான கட்டமைப்பாகும்.
இது கிளையற்றது, ஒன்றுக்கொன்று சமாந்தரமாக இத்தசைக்கலங்கள் அமைந்துள்ளன.
ஒவ்வொரு தசைநாரும் பல கருக்களை கொண்டுள்ளது,அக்கருக்கள் மேற்பரப்பில் அமைந்துள்ளன.
தசைநார் வரி கொண்டது.
ஒரு தசைநார்/தசைக்கலம் சூழ தசைக்கல மென்சவ்வையும் உள்ளே கரு,குழியவுருவையும் கொண்டுள்ளது.
ஒரு கலத்தில் பல கருக்கள் காணப்படுவதால் தசைக்கலம் பொதுமைகுழியத்துக்குரியது.
தசைக்கலத்தில் பொதுவான விலங்கு கலப்புன்னங்கள் காணப்படும்.
- உ – ம் :
  - கொல்கிச்சிக்கல்
  - Lysosome
  - நுண்ணுடல்
  - Ribosome
  - குழியவன்கூடு
  - ER
  - இழைமணி
  - தசைசிறுநார்கள்
தசைநாரில் அழுத்தமான ER , இழைமணிகள், தசைச் சிறுநார்கள் என்பன அதிகளவில் காணப்படும்.
தசைச்சிறுநார்கள் ஒவ்வொன்றும் சமாந்தரமாக காணப்படும்.
ஒரு தசைச்சிறுநாரில் பல தசைப்பாத்துக்கள் காணப்படும்.
தசைச்சிறுநார் 2 வகையான இழைகளைக் கொண்டுள்ளது:
- தடித்த இழை/மயோசின் இழை
- மெல்லிய இழை /அக்ரின் இழை
இவ்விழைகள் தசைச்சிறுநாரில் நீளப்போக்கில் ஒழுங்குபடுத்தப்பட்டுள்ளன.
தடித்த இழை மயோசின் புரதத்தாலானது.
மெல்லிய இழை அக்ரின் புரதத்தாலானது.
இத்தசையிழைகளின் ஒழுங்கமைப்பு காரணமாக தசைச் சிறுநார்களில் பட்டிகை ஒழுங்கமைப்பு ஏற்படுத்தப்படுகின்றது.
தடித்த இழைகள் ஒன்றுடனொன்று ஒழுங்குபடுத்தப்பட்டு இருளான A பட்டி பெறப்படும்.
தடித்த இழைகள் யாவும் தசைப்பாத்தின் மத்தியிலுள்ள ஒரு மென்சவ்வுடன் இணைந்துள்ளன.
இம்மென்சவ்வு /A பட்டியின் மத்தியப்பகுதி M கோடு எனப்படும்.
இருள் குறைந்த வளையம்/ I பட்டியில் மெல்லிய இழைகள் மட்டும் காணப்படும்.
எனப்படும்இது இருள் குறைந்த வளையம் /ஒளி வளையம் .
மெல்லிய இழைகள் தசைப்பாத்தின் முனைகளிலுள்ள மென்சவ்வில் இணைந்துள்ளன.
இம்மென்சவ்வு/மெல்லிய இழையின் நடுப்பகுதி Z கோடு எனப்படும்.
H வளையத்தில் இழைகள் ஒன்றையொன்று மேவாது.
இங்கு தடித்த இழை மட்டும் காணலாம்.
தசைச்சிறுநாரிடம் கட்டமைப்பு Z கோட்டிலிருந்து Z கோடாக மீண்டும் மீண்டும் தொடர்வதாக அமையும்.
இரு Z கோட்டுக்கு இடைப்பட்ட பகுதி தசைப்பாத்து ஆகும்.
Z கோடு இருள்குறைந்த வளையம் /ஒளி வளையத்தின் மத்திய பகுதி ஆகும்.

தசைச்சுருக்கப் பொறிமுறை

இப்பொறிமுறை வழுக்கல் இழை கொள்கை (The sliding filament theory) மூலம் விளக்கப்படுகிறது.
மயோசின் இழைகள், மயோசின் தலைகளைக் கொண்டுள்ளது.
அக்ரின் இழைகள் தொடர்புறும் தானங்கள் / இணையும் பகுதிகளைக் கொண்டுள்ளன.
தசைச்சுருக்கம் நடைபெறுவதற்கு ATP அவசியமானது.
மயோசின் தலைகள் விடுபட்டுக் கொள்ளவும் அடுத்து தொடர்புறும் தானத்தை நோக்கி நகரவும் ATP தேவைப்படும். ATP இல்லாத சந்தர்ப்பத்தில் மயொசின் இழை விடுபட மாட்டாது.
தசைச்சுருக்கப் பொறிமுறையின் 1 வது படியில்;
- அக்ரின் இழையிலிருந்து விடுவிக்கப்பட்ட தலையுடன் ATP இணையும்
- ATP நீர்ப்படைவதனால் மயோசின் தலை தயார் நிலைக்கு கொண்டுவரப்படும்.
- Ca2+ அயனின் உதவியுடன் மயோசின் தலையானது அக்ரின் இழையின் தொடர்புறும் தானத்துடன் இணைந்து குறுக்குபாலம் தோற்றுவிக்கப்படும்.
- குறுக்குபாலங்கள் பிரயோகம் / உயிர்ப்பூட்டப்படும் போது உட்புறமான மத்தியை நோக்கி சாய்வாக அசைந்து ஒரு குறுகிய வலுவான அடிப்புக்குள்ளாகும். இது அக்ரின் இழையை வழுக்கச் செய்கின்றது.
- அக்ரினும் மயோசினும் ஒன்றையொன்று மேவி வழக்குவதால் தசை சுருங்கும்.

அக்ரின் இழைகள் தசைப்பாத்தின் மத்தியை நோக்கி இழுக்கப்படும்.
இதனால் ஒரு தசைப்பாத்தின் Z கோடுகள் மத்தியை நோக்கி அசையும்.
தசை சுருங்கும் போது A பட்டி / இருள் வலயம் அதே நீளத்துடன் காணப்படும்.
I பட்டி / இருள் குறைந்த வலயம், H வலயம் என்பன குறுகும்.
தடித்த இழை, மெல்லிய இழை என்பன அதே நீளத்தில் பேணப்படும்.

RATE CONTENT 0, 0

QBANK (4 QUESTIONS)

Comments Hide Comments(0)

இங்கே உங்கள் எழுத்துக்களை தமிழில் பதிவு செய்ய, நீங்கள் ஆங்கிலத்தில் டைப் செய்யும் எழுத்துக்கள் ‘Space Bar’ ஐ அழுத்தியவுடன் தமிழில் தோன்றும். உங்கள் எழுத்துக்கள் ஆங்கிலத்தில் இருக்க CTRL+G ஐ அழுத்தவும். மறுபடியும் தமிழில் டைப் செய்ய மீண்டும் CTRL+G ஐ அழுத்தவும்